Kuanheun,gmitklasiskupangbarat.or.id –Nofelius Sau, S.Sos, lahir pada 29 November 1996 dan meninggal dunia pada 21 November 2022. Ia adalah Ketua Pengurus Pemuda GMIT Jemaat Lahairoi Kuanheun. Ia aktif dalam pelayanan di klasis sebagai pengurus pemuda GMIT Klasis Kupang Barat dan bagian dari Tim Multimedia Klasis.
Nofel (sapaan akrab) dimakamkan dalam prosesi ibadah penguburan yang dipimpin oleh Pdt. Maria Dimu, S.Th, M.Pd Pelayan GMIT Lahairoi Kuanheun. Do’a syafaat dalam ibadah penguburan disampaikan oleh Pdt Doddy Octavianus, S.Th. Berikut ini kutipan isi doa Pdt. Doddy dalam bahasa Melayu Kupang.
“Bapa yang ada di sorga… Bapa eee… Sakarang di bawah ini tenda ni, katong samua tunduk dan menghadap Bapa. Sebenarnya katong mau marah, mau protes, katong sonde terima deng Bapa pung keputusan ni. Kanapa Bapa pange pulang Nofel pi Bapa pung rumah? Katong tau memang katong samua nanti akan pi situ. Tapi kenapa sekarang? Bapa sonde bisa tahan sedikit lai ko? Biar ko dia hidup deng katong! Ktg masih butuh dia, Bapa e… Bapa liat sa, Nofel pung orangtua, Bapa Edy deng Mama Dor ju masih menangis sonde barenti-barenti. Dong sonde tarima ju. Bapa su titip Nofel di mama deng bapa, dong su urus kasi besar dia, sehat, kuat lai, ganteng ju. Dia pung Kaka Aris, Nani, Nofal deng adi dong talalu sayang dia. Dia ju ada nona, su pacaran lama, rencana mau ba’urus dong ko nikah su. Apalai dia pung kawan pemuda talalu banyak. Dong ju masih butuh juga, Bapa. Di pelayanan gareja, kawan barmaen hari-hari deng kawan di tempat kerja. Semua ada sedih ko manyasal sonde terima. Kenapa Bapa su bawa dia pulang sekarang e…?
Dia talalu bae, Bapa. Sopan, hargai orang, sonde pernah marah-marah orang, suka nasehat adi-adi dong, suka dengar katong pung nasehat juga. katong omong ni karna katong su rasa bakawan deng dia karmana.
Bapa e. Katong manangis-manangis sampe aer mata karing. Sedih. Susah sekali, Bapa. Tapi katong mau omong apalai? Menangis sa sudah. Katong tau. Memang Bapa pung hak bawa Nofel. Dia Bapa pung anak na. Biar Bapa bawa sa sudah.
Rela sonde rela ju, katong tarima sa. Katong tau di rumah di sorga sana jauh lebe bae dari rumah di sini. Biar dia sonde susah lai. Dia sonde sakit lai. Bapa bawa ko kasi sembuh dia.
Ma Bapa jang bawa samua-samua e. Kas tinggal kasi katong kenangan di hati, di pikiran karna pasti katong akan sebut dia terus na. Deng bagitu mungkin katong rasa dia hidup deng katong.
Bapa… Katong tau kalo bakawan dalam Tuhan tu abadi. Sonde bisa putus deng mati begini. Neu, katong titip salam kasi dia e, Bapa. Kastau dia bilang tunggu katong di sana. Nanti pasti katong akan bakatumu lai deng dia di Bapa pung rumah.
Katong hanya bisa bilang tarima kasih e. Bapa tau katong sedih makanya Bapa kirim banyak orang datang hibur katong. Datang bantu katong. Tapi katong harap Bapa hibur katong tarus. Kasi kuat katong. Kasi kuat Nofel pung mama, bapa, kaka adik, dia pung nona ju, deng kawan-kawan. Karna abis ini katong hidup su laen ko dia sonde ada lai.
Makasih banyak juga Bapa untuk waktu sama-sama deng dia. Walau sebenarnya katong masih mau lebe lama deng dia. Tapi katong iko Bapa pung mau sa. Katongg sonde mau marah deng protes Bapa lai. Biar ko dia ju jalan deng tenang-tenang sa sudah. Katong tau itu yg paling bae. Makasih banyak Bapa di sorga. Amin.”
Kuanheun, 23 November 2022
Pendoa: Pdt. Doddy S. Octavianus S.Th (KMK Kupang Barat)
GMIT Klasis Kupang Barat bagi kemuliaan Tuhan.f
Kontributor: Pdt. Aneke Ina
Editor: Pdt. yft hb
